Abstract
Ko te pūtake o tēnei rangahau, he wānanga i ngā kōrero mō te kaupapa nei, arā, ko te tahuritanga o ngā kōrero, o ngā tikanga Māori kia noho hei rauemi hangarau. Kua roa rawa te wā e noho tahi ana a Ngāi Māori me ēnei rauemi. Kāore e kore he pānga tō ēnei rauemi ki te tangata ahakoa te iti, te rahi rānei o tā te tangata whakamahi i ēnei momo taputapu. E mōhio ana tātou kua muia te ao ki ēnei taputapu hangarau, kei ia pito o te ao he momo ki reira. Tē taea te huna, ahakoa rorohiko mai, waea pūkoro mai, pouaka whakaata, haere tonu, hare tonu he pānga tā ia tangata, kaumātua mai, tamariki mai kāore e kore he pānga tō ia ki ēnei momo rauemi. He tirohanga tēnei rangahau ki te enei momo hangarau kia noho hei waka kawe i o mātou rawa, arā, ko tō tātou ao Māori tau manomano e haere mai ana kei ngaro pērā i te moa.
Ko tāku he wānanga kōrero e pā ana ki ēnei momo hangarau hei rauemi whakaora i tō tātou reo Māori, ā , hei rauemi whakapakari i ā tātou tikanga, i tō tātou ao Māori hoki. Kua roa nei tātou, te Māori, e kaha tautoko ana i ngā momo hangarau i roto i ngā rau tau kua pahemo. E hara tēnei āhuatanga, i te mea he tauhou ki a ngāi tātou te Māori. Kua tae ki te wā me wānanga tātou i tēnei kaupapa kia noho kōhatu ēnei momo hei kaihāpai mō te iwi Māori, ā , mā te rangahau ngā kōrero e whiriwhiri, e wewete kia poipoia tēnei haerenga. Kia kaua tātou e pōhēhē, ko tēnei te tīmatanga me te otinga, e kāo, he hua anō tō tēnei tuhinga hei whakakī i ngā wai o te puna mātauranga kia wātea ai tātou te inu i ngā wai nei. Ka mutu, kia puta mai ai he rauemi e whakamahia ana ēnei taputapu hei kīnaki i ngā kōrero kia noho hei tauira o tēnei waka hangarau hei kawe i ngā rawa o te Māori mō ngā tau e haere mai ana.
